ԿԳՄՍ նախարարության աջակցությամբ, Հայաստանում Ֆրանկաֆոնիայի օրերի շրջանակում, Հայաստանի պետական կամերային նվագախումբը, ՀՀ-ում Ֆրանսիայի Հանրապետության դեսպանությունը և «Institut français d’Arménie» ներկայացնում են համերգ՝ նվիրված ֆրանսիացի հանրահայտ կոմպոզիտորներ Կամիլ Սեն-Սանսի 190-ամյա և Մորիս Ռավելի 150-ամյա հոբելյաններին։ Կներկայացվեն կոմպոզիտորների ամենասիրված ստեղծագործությունները՝ ֆրանսիացի ճանաչված դիրիժոր Ռալֆ Զիգետիի մեկնաբանությամբ։ 

Ռալֆ Զիգետին հայտնի է ինչպես դասական, այնպես էլ ժամանակակից երաժշտության բազմազան մեկնաբանություններով։ Իր կարիերայի ընթացքում նա համագործակցել է Եվրոպայի առաջատար նվագախմբերի հետ՝ ղեկավարելով Ֆրանսիայի ազգային և Լոնդոնի ֆիլհարմոնիկ նվագախմբերը։ 

Ռալֆ Զիգետին արդեն իսկ համագործակցել է նվագախմբի հետ՝ ղեկավարելով 2023 թվականին Ֆրանկոֆոնիայի օրերի շրջանակում իրականացված հատուկ համերգը։

Ծրագիր՝

Կամիլ Սեն-Սանս – Կենդանիների դիմակահանդես  

14 մասից բաղկացած հումորային սյուիտ, որն երաժշտության միջոցով ներկայացնում է կենդանիների կերպարները։ Սեն-Սանսն իր կենդանության օրոք արգելել է այս ստեղծագործության հրապարակային կատարումները՝ համարելով, որ դրա անլրջությունը կվնասի իր՝ որպես լուրջ կոմպոզիտորի համբավին։ Սյուիտը հրատարակվել է 1922 թվականին՝ նրա մահից մեկ տարի անց։ Հանրային ներկայացումը նույն տարի ավելի ուշ ընդունվեց ոգևորությամբ, և այն դարձավ ամենահայտնի ստեղծագործություններից մեկը: 

Բաժիններ

1. Ներածություն և առյուծի թագավորական քայլերթ

2. Հավեր և աքաղաղներ

3. Հեմիոններ (արագաշարժ կենդանիներ)

4. Կրիաներ

5. Փիղ

6. Կենգուրուներ

7. Ակվարիում

8. Երկար ականջներով կերպարներ (ավանակներ)

9. Կկուն անտառի խորքում

10. Թռչնանոց

11. Դաշնակահարներ (կատակերգական պատկեր ուսանողների վարժանքների մասին)

12. Ֆոսիլներ-Բրածոներ 

13. Կարապ 

14. Վերջաբան

Կամիլ Սեն-Սանս – Մահվան պարը (սիմֆոնիկ պոեմ)

Մորիս Ռավել – Գնչուն (կոնցերտային ռապսոդիա ջութակի և նվագախմբի համար) 

Մենակատար՝ Աստղիկ Վարդանյան 

Մորիս Ռավել – Պավանա  

Ժյուլ Մասնե – «Մեդիտացիա» զգացմունքային ջութակի սոլո՝ Թաիս օպերայից: 

Մենակատար՝ Աստղիկ Վարդանյան

Շառլ Ազնավուր – La Bohème, Emmenez-moi, She 

Սկիզբը՝ 19։00։

Մինչև 6 տարեկան երեխաների մուտքն արգելվում է: